Një grua australiane është dënuar me burgim të përjetshëm, pa asnjë shans për lirim për të paktën 33 vjet, për vrasjen e tre të afërmve dhe përpjekjen për të vrarë një tjetër me anë të kërpudhave toksike.
Dënimi me burg, një nga më të gjatët e dhënë ndonjëherë ndaj një vrasëse femër në Australi, do të thotë që Erin Patterson, 50 vjeç, do të jetë në të 80-at, para se të mund të aplikojë për lirim me kusht.
Patterson vrau vjehrrit e saj, Don dhe Gail Patterson, të dy 70 vjeç, dhe motrën e Gail, Heather Wilkinson, 66 vjeç, pasi u shërbeu atyre një mish viçi të helmuar, në shtëpinë e saj në Victoria në vitin 2023.
Burri i Heather-it, Ian Ëilkinson, një pastor vendas, i mbijetoi drekës pasi u shërua nga koma dhe ka probleme të vazhdueshme shëndetësore që lidhen me helmimin.
Burri i larguar i Patterson, Simon Patterson, duhej të merrte pjesë gjithashtu në drekë, por e anuloi në minutën e fundit, pjesërisht për shkak të bindjes së tij se gruaja e tij ishte përpjekur ta helmonte për vite me radhë.
Patterson ka kohë që e mban pafajësinë e saj, duke thënë se kërpudhat toksike në pjatën që ajo përgatiti u shtuan aksidentalisht dhe se ajo kurrë nuk kishte ndërmend t’i dëmtonte të afërmit e saj.
Ajo do të vuajë tre dënime të njëpasnjëshme me burgim të përjetshëm për tre vrasjet dhe 25 vjet për tentativën e vrasjes së zotit Wilkinson.
Gjatë fjalës së tij në shpalljen e dënimit, gjyqtari Christopher Beale tha se rëndësia e krimeve të Patterson, nënkuptonte se ai duhet të vendoste “dënimin maksimal”.
Prokurorët kishin argumentuar se nëna e dy fëmijëve duhet të dënohet me burgim të përjetshëm pa mundësi lirimi – dënimi më i ashpër në dispozicion në Australi.
Gjyqtari Beale u pajtua se krimet ishin më të këqijat e këtij lloji, por tha se vendimi i tij për të lejuar lirimin me kusht, u ndikua nga “kushtet e ashpra të burgut” me të cilat përballet Patterson në burg – duke përfshirë 15 muaj të kaluar në izolim deri më tani, dhe “mundësinë e konsiderueshme”, që ajo të përballet me më shumë për sigurinë e saj.
Gjykatësi vuri në dukje se reputacioni i Patterson dhe niveli i lartë i interesit të medias dhe publikut në rastin e saj, nënkuptonin se ajo ka të ngjarë të “mbetej një e burgosur famëkeqe për shumë vite që do të vinin dhe, si e tillë, do të mbetej në rrezik të konsiderueshëm nga të burgosurit e tjerë”.
Ai përshkroi më tej kushtet aktuale të burgut të Patterson në një burg femrash me siguri maksimale, ku ajo kalon 22 orë në ditë në qelinë e saj pa kontakt me të burgosurat e tjera për shkak të “statusit të saj si shkelëse e rëndë”.
Gjyqtari Beale theksoi se prokuroria nuk kishte pretenduar ndonjë motiv për krimet e Patterson gjatë gjyqit nëntë-javor për vrasje, i cili përfundoi dy muaj më parë, dhe se ai as nuk do ta bënte këtë.
“Vetëm ti e di pse i ke kryer ato,” tha ai, duke iu referuar tre vrasjeve dhe tentativës së vrasjes. “Nuk do të spekuloj për këtë çështje.”
Gjykatësi tha se Patterson “nuk tregoi asnjë mëshirë” për viktimat e saj në ditët pas drekës, ndërsa ata që kishin ngrënë vaktin e saj toksik luftonin për jetën e tyre në spital.
“Dështimi juaj për të shfaqur ndonjë keqardhje u hodhi kripë plagëve të të gjitha viktimave”, i tha ai gjykatës.
Jashtë gjykatës, Ian Wilkinson, i mbijetuari i vetëm i drekës fatale, foli publikisht për herë të parë rreth përvojës së hidhur që i shkatërroi familjen./ BBC.
