Kryetari i Partisë Demokratike, Sali Berisha, ka paraqitur një panoramë të zymtë të situatës politike dhe sociale në gjatë fjalës së tij në Asamblenë Parlamentare të Partisë Popullore Evropiane (PPE) në Strasburg, duke e vënë theksin te procesi zgjedhor. Duke iu drejtuar anëtarëve të PPE-së, Berisha theksoi se Shqipëria ndodhet në një “situatë të vështirë” dhe akuzoi qeverinë e vendit për lidhje të ngushta me kartelet e drogës, duke kërkuar një mision të posaçëm fakt-mbledhës nga PPE për të verifikuar këto pretendime.
Në fillim të fjalës së tij, Berisha falënderoi PPE-në për mbështetjen dhe rezolutën e miratuar në Valencia, e cila, sipas tij, evidentoi problemet serioze me procesin zgjedhor në Shqipëri. Ai deklaroi se zgjedhjet e fundit ishin manipuluar në mënyrë të paskrupullt, duke e kthyer të gjithë shtetin në një “trupë elektorale”. Ai akuzoi qeverinë për përdorim të pamatë të burimeve financiare, njerëzore dhe logjistike, si dhe të pushtetit ekzekutiv, për të ndaluar, kontrolluar dhe manipuluar votën e qytetarëve shqiptarë.
Më tej, Berisha u ndal tek “dhuratat” e qeverisë gjatë fushatës zgjedhore, duke përmendur shpërndarjen e 100 eurove për çdo pensionist dhe faljen e 200 milionë eurove gjoba dhe interesa dy ditë para votimeve. Ai gjithashtu akuzoi qeverinë për mobilizimin e dhjetëra mijëra punonjësve të administratës si “patronazhistë” me akses në të dhënat personale të qytetarëve, të cilat u përdorën për joshje dhe kërcënime.
Duke kaluar në çështjen e drogës, Berisha e cilësoi Shqipërinë si “i vetmi narko-shtet në Europë”. Ai u shpreh se Kryeministri i Shqipërisë ka dhënë 138 licenca për kultivim droge, duke tejkaluar ndjeshëm kufirin ligjor të 200 hektarëve për qëllime mjekësore, dhe duke lejuar kultivimin në 29,000 hektarë, ekuivalent me mbi 100 milionë rrënjë kanabis. Ai vuri në dukje vlerën e lartë të një rrënje kanabisi në treg, duke sugjeruar përmasa të mëdha të fitimeve të paligjshme.
Ai argumentoi se kartelat e drogës në vendin e tij janë më të fuqishmet në Europë, me kontroll mbi portet kryesore dhe rrugën e heroinës. Berisha akuzoi zyrtarë të lartë të policisë, prokurorisë, ministrave dhe vetë Kryeministrin për bashkëpunim me këto kartele.
Duke njohur vështirësinë e situatës, por duke shprehur bindjen se ajo mund të luftohet, Berisha kërkoi ndihmën e PPE-së dhe partive simotra për të dërguar një mision verifikues në Shqipëri. Ai theksoi se një mision fakt-mbledhës do të kishte rëndësi të jashtëzakonshme jo vetëm për Shqipërinë, por edhe për vendet e tjera evropiane, duke qenë se Shqipëria është një eksportuese e madhe kriminaliteti, droge dhe emigrantësh.
Berisha siguroi Asamblenë Parlamentare të PPE-së se ai dhe forcat e tij politike kanë në dispozicion një sasi të madhe dokumentesh që provojnë lidhjet e shtetit shqiptar me kartelet e drogës, përfshirë lidhjet me kartelet e njohura ndërkombëtare si Sinaloa nga Meksika dhe kartelet nga Medelin, Bolivi, Peru dhe Ekuador. Ai shprehu besimin se me ndihmën e PPE-së, mund të ndihmojnë Shqipërinë, rajonin dhe vetë Bashkimin Evropian.
Në përfundim të fjalës së tij, Berisha falënderoi PPE-në për ndihmën dhe mbështetjen e vazhdueshme.
PPE pranon kërkesën e Berishës: Mision faktmbledhës do të dërgohet në Shqipëri
Partia Popullore Europiane (PPE) ka vendosur të përfshijë Shqipërinë në axhendën e saj për misione verifikimi. Vendimi erdhi pas kërkesës së Kryetarit të PD, Sali Berisha, i cili kërkoi ndihmën e PPE-së dhe partive simotra gjatë fjalës së tij në asamblenë politike të PPE në Bruksel për të dërguar një mision faktmbledhës në vendin tonë.
Sekretarja e Përgjithshme e PPE-së, Dolors Montserrat, deklaroi: “Vendosëm të bëjmë dy misione, një në Liban dhe një në Moldavi, por tani do ta vendosim si prioritet edhe Shqipërinë. Mendoj se është një ide e mirë kur na kërkoni diçka, ndaj do ta vendosim si një nga prioritetet dhe objektivat tona që të bëjmë një mision në Shqipëri.”
Tag: asamblenë
-
Berisha në Asamblenë Parlamentare të PPE: Shqipëria në situatë të vështirë, vjen një mision fakt-mbledhës
-
Berisha nxin Shqipërinë në Asamblenë e PPE: Shqipëria narko-shtet, ka kartelet më të fuqishme në Europë
Sali Berisha ka ngritur alarmin – gjatë fjalës së tij në asamblenë e PPE-së – duke thënë se vendi ynë është “narko-shteti” i vetëm në Europë.
Berisha kërkoi dërgimin e një misioni fakt-mbledhës në Shqipëri, teksa tha se kartelet shqiptare janë më të fuqishmet në Europë pasi kanë në dorë portet e vendit dhe janë të lidhura me prokurorë, policë dhe ministra.
Fjala e Berishës në asamblenë politike të PPE:
Shqipëria është në një situatë të vështirë! Kemi mijëra dokumente që faktojnë lidhjen e shtetit me kartelet e drogës, duhet një mision fakt-mbledhës nga PPE
Faleminderit, zoti sekretar i Përgjithshëm, i nderuar z. president.
Së pari, dua të falënderoj PPE-në dhe Presidencën e PPE-së për konferencën që organizuan në Mal të Zi dhe për rezolutën që miratuan në Valencia, në të cilën paraqitën të gjithë situatën në vendin tim në prag të zgjedhjeve, një situatë që tregoi se vota ishte e vdekur para se të hynte në kutinë e votimit.
Në fakt, në këto zgjedhje, i gjithë shteti u shndërrua në një trupë elektorale. U përdorën fuqitë financiare, njerëzore, logjistike, ekzekutive, pa kufij për të ndaluar, për të kontrolluar dhe për të manipuluar votën e qytetarëve shqiptarë.
Qeveria, gjatë fushatës zgjedhore, në kundërshtim me ligjet dhe me parimet ndërkombëtare, u dhuroi çdo pensionisti, që përfaqëson 48% të votuesve, nga 100 euro. Dy ditë para zgjedhjeve, ajo fali 200 milionë euro gjoba dhe interesa.
Ajo mobilizoi dhjetëra mijëra punonjës të administratës, të kthyer në një lloj “policie politike” të quajtur patronazhistë. Patronazhistë të armatosur me të dhëna personale të marra nga sistemet digjitale të qeverisë dhe bankave, të cilat u përdorën për të joshur apo kërcënuar qytetarët në të gjithë vendin.
Nga ana tjetër, siç e dini, Shqipëria është i vetmi narko-shtet në Europë. Zoti Kryeministër i Shqipërisë dha 138 licenca për kultivim droge. Nëse ligji lejon kultivimin për qëllime mjekësore në vetëm 200 hektarë, këtë herë ai dha 29,000 hektarë – një shifër që përkthehet në më shumë se 100 milionë rrënjë kanabis. Një rrënjë ka vlerë nga 500 deri në 1,000 euro. Kjo ishte, pak a shumë, atmosfera në të cilën u zhvilluan këto zgjedhje.
Zonja Sekretare e Përgjithshme, ju theksuat përfshirjen e shtetit. Në të vërtetë, nuk ishte vetëm shtet, ishte një narko- -
SYRI TV/ 11 maj, Vokshi flet në asamblenë e CDI–IDC: Demokracia u rrëzua nga krimi dhe dhuna
Në asamblenë e CDI-IDC, deputetja e Partisë Demokratike Albana Vokshi denoncoi me fakte konkrete rrëzimin e demokracisë në Shqipëri gjatë zgjedhjeve parlamentare të 11 majit. Në fjalën e saj, deputetja Albana Vokshi renditi faktet të cilat vërtetojnë farsën elektorale të 11 majit, si dhe akuzoi kandidatët e mazhorancës socialiste se u mbështetën nga organizatat kriminale. Në fjalën e saj, Vokshi theksoi se në Vorë u kërcënua familjarisht dhe nuk u mor asnjë masë nga policia dhe institucionet e drejtësisë.
SYRI TV
Deputetja e Partisë Demokratike Albana Vokshi denoncoi me fakte konkrete rrëzimin e demokracisë në Shqipëri gjatë zgjedhjeve të 11 majit. Në Asamblenë e IDC-CDI, deputetja demokrate u shpreh se në Shqipëri u zhvillua një farsë elektorale, ku qytetarët nuk u lejuan të zgjedhin, dhe kandidatët e mazhorancës socialiste u mbështetën nga organizatat kriminale.
Sot qëndroj përpara jush si një dëshmitare e rrëzimit të demokracisë në vendin tim. Më 11 maj 2025, në Shqipëri u mbajtën ato që u quajtën ‘zgjedhje.’ Por ato nuk ishin as të lira, as të ndershme, as demokratike. Në fakt, nuk ishin zgjedhje fare. Shqiptarëve nuk iu dha mundësia të zgjedhin, ata u detyruan të votojnë. Më vjen keq ta them: zgjedhjet ishin një farsë, një operacion i orkestruar nga një narco-shtet. 30 kandidatë, në 10 qarqe, në mbi 20 bashki u mbështetën nga kartelet e drogës dhe organizatat kriminale. Më shumë se 20 deputetë do të ulen tani në Parlament falë parave të mafias dhe karteleve. Ata do të përfaqësojnë interesat e krimit, jo të shqiptarëve.
Vokshi ka treguar se si në Vorë u kërcënua familjarisht për shkak se qendrat e votimit u pushtuan nga persona me precedent kriminal, ndërsa ka bërë me dije se policia dhe institucionet e drejtësisë nuk morën masa për këtë skandal.
Në Vorë, ku isha kandidate dhe Drejtuese Politike, qendrat e votimit u pushtuan nga kriminelë: të dënuar për vrasje dhe trafik droge në Shqipëri dhe vende të tjera europiane. Anëtarë të grupeve kriminale mbanin distinktivë fallco dhe kërcënonin hapur votuesit. Njerëz të armatosur bashkëpunonin me ministra dhe zyrtarë të shtetit. Unë u fyeva, u intimidova dhe u kërcënova vazhdimisht. Familja ime, vajza ime, u kërcënuan nga të njëjtët persona që unë i kisha raportuar te mekanizmi i posaçëm i ngritur për të parandaluar dhunën, krimin elektoral. Por jo vetëm që ata nuk arritën të më mbrojnë mua dhe familjen time, ata nuk arritën të parandalonin asnjë krim zgjedhor, sepse rrjeti i patronazhit dhe kartelet e drogës ishin ata që vendosnin për votën. Policia nuk bëri asgjë. SPAK nuk bëri asgjë. Komisioni Qendror i Zgjedhjeve bëri sikur nuk pa asgjë.
Në asamblenë e IDC-CDI-së ku u miratua rezoluta e cila dënonte zgjedhjet e 11 majit duke i cilësuar farsë elektorale, Partia Demokratike u përfaqësua nga deputetja Albana Vokshi dhe Drejtuesi Politik i PD-së për Tiranën, Belind Këlliçi.
-
Zëvendëssekretari i Shtetit në Asamblenë Parlamentare të NATO-s: Do të punojmë vetëm me ata që janë të përkushtuar ndaj një realizmi praktik për vendet e tyre
Ambasada e SHBA në Tiranë ndan deklaratën e Zëvendëssekretarit të Shtetit Christopher Landau në Asamblenë Parlamentare të NATO-s në 2025-ën:
“Shtetet e Bashkuara mund të jenë një partner i gatshëm me kapital të konsiderueshëm politik. Mund të punojmë shumë; por do të punojmë vetëm me ata që janë të përkushtuar ndaj një realizmi praktik për vendet e tyre. Ne i refuzojmë të dy ekstremet e papranueshme të dëshirës për një transformim të jashtëzakonshëm, nga njëra anë, ose të rishikimit të ankesave të lashta, nga ana tjetër. Politika e pafundme dhe e zgjeruar, pa kufizim dhe përulësi historike, bëhet një armik i strategjisë dhe i shtetndërtimit kushtetues. Ky nuk është qëllimi ynë, funksioni ynë, apo misioni ynë.” -
Presidenti Begaj në Asamblenë Parlamentare të NATO-s: Shqipëria e përkushtuar ndaj paqes, sigurisë dhe integrimit Euroatlantik
Presidenti i Republikës, Bajram Begaj, ishte i ftuar si folës nderi në seancën plenare në Asamblenë Parlamentare të NATO-s, “Dayton Challenges for EU Integration”.
Kreu i Shtetit vlerësoi rolin e Aleancës Veri-Atlantike për sigurinë dhe stabilitetin në botën demokratike, rëndësinë e besimit, bashkëpunimit dhe vigjilencës mes anëtarëve të NATO-s për ruajtjen e paqes, si edhe nevojën thelbësore të pranisë së SHBA-BE në rajonin e Ballkanit.
Ndërsa foli për rrugëtimin Euroatlantik të vendit, Presidenti Begaj theksoi përkushtimin e Shqipërisë ndaj mbrojtjes kolektive me rritjen e investimeve në mbrojtje:“Ne jemi të përkushtuar ndaj mbrojtjes kolektive dhe mbetemi të përkushtuar ndaj ndarjes së përgjegjësive më të mëdha për sigurinë evropiane. Është një domosdoshmëri strategjike të përmirësohen dhe të mbështeten investimet në mbrojtje dhe siguri.
Shqipëria ka rritur buxhetin e saj të mbrojtjes. Ne kemi rritur buxhetin tonë të mbrojtjes, po rigjallërojmë industrinë tonë të mbrojtjes dhe po investojmë në infrastrukturën ushtarake dhe korridoret strategjike të transportit për të rritur lëvizshmërinë ushtarake.
Shqipëria do të vazhdojë të përmbushë të gjitha detyrimet dhe të kontribuojë në mënyrë konstruktive në përpjekjet kolektive të Aleancës në investimet në mbrojtje, mbështetjen për Ukrainën, përshtatjen strategjike dhe stabilitetin rajonal”.
Veç përmbushjes së detyrimeve si pjesë e NATO-s, Presidenti Begaj rikonfirmoi qëndrimin e Shqipërisë krah Shteteve të Bashkuara dhe Bashkimit Evropian.
“Shqipëria mbetet thellësisht e përkushtuar për të promovuar integrimin Euroatlantik në rajon. Jemi krenarë për partneritetin tonë strategjik me Shtetet e Bashkuara. Jemi krenarë që jemi një vend anëtar i NATO-s dhe një kandidat për në BE”.
Në 30-vjetorin e marrëveshjes së Dayton-it, Presidenti Begaj çmoi firmosjen e këtij dokumenti jo vetëm për Bosnjë dhe Hercegovinën, por edhe për paqen dhe stabilitetin në të gjithë Ballkanin, teksa bëri thirrje për dialog, marrëdhënie të fqinjësisë së mirë dhe bashkëpunim rajonal.
“Duke reflektuar mbi tre dekadat e fundit dhe sfidat me të cilat përballemi sot, ne, shtete të vogla si Shqipëria, jemi më të bindur se kurrë se një prani strategjike e qëndrueshme e Shteteve të Bashkuara dhe Bashkimit Evropian në rajonin tonë është thelbësore”, – deklaroi Presidenti Begaj.
Presidenti i Republikës, apeloi për më shumë angazhim në ruajtjen e paqes, të cilën ai e cilësoi si fillimin e gjithçkaje tjetër që duam për të ndërtuar dinjitet, drejtësi, mundësi:
“Paqja është e paçmuar, por ka nevojë për investime. Paqja ekziston, por ka nevojë për përforcim. Progresi ekziston, por ka nevojë për vizion dhe drejtim”.
“Dayton-i kishte të bënte me përfundimin e një lufte. Kapitulli tjetër duhet të jetë për ndërtimin e diçkaje më të mirë, më të qëndrueshme, më të bashkuar, më të përgatitur për të përballuar të ardhmen”, – përfundoi fjalën në Asamblenë Parlamentare të NATO-s Presidenti i Republikës, gjatë së cilës përcolli një falënderim të veçantë ndaj Kongresmenit Michael Turner, Kreut të delegacionit amerikan në Asamblenë Parlamentare të NATO-s, i cili vendosi Dayton-in për mbajtjen e këtij sesioni pranveror./vizionplus.tv -
Shenjë proteste ndaj KOKSH-it, edhe FSHSU-ja bojkoton Asamblenë e 31-të të Përgjithshme
Federata Shqiptare e Sportit Universitar (FSHSU), si anëtare me të drejta të plota në Komitetin Olimpik Kombëtar Shqiptar (KOKSH), shpreh mbështetje të plotë ndaj qëndrimit të Federatës Shqiptare të Futbollit (FSHF) për të mos marrë pjesë në Asamblenë e 31-të të Përgjithshme të KOKSH, që do të zhvillohet më 23 prill 2025.
Kjo mbështetje vjen si reagim ndaj një vendimi të padrejtë të KOKSH, i cili refuzoi përfshirjen në rendin e ditës të një kërkese zyrtare dhe legjitime të FSHF-së, për të trajtuar zbatimin e vendimit përfundimtar të Gjykatës së Arbitrazhit për Sportin (CAS). Në vend të kësaj, në rend dite është vendosur një monolog i paralajmëruar i Presidentit të shkarkuar të KOKSH.
Vendimi i CAS ka shpallur të pavlefshme proceset dhe vendimmarrjet e mëparshme të KOKSH, duke renditur shkelje të qarta të të drejtave të anëtarëve dhe të procedurave statutore.
Refuzimi për të dëgjuar një anëtar të barabartë dhe për të diskutuar çështje të një rëndësie thelbësore institucionale përbën një shkelje të hapur të parimeve demokratike dhe të frymës olimpike. Ky veprim bie ndesh jo vetëm me Kartën Olimpike, por edhe me Kartën Evropiane të Sportit dhe çdo standard të mirëqeverisjes në organizatat sportive.
Kur federata më e madhe sportive në vend nuk lejohet të shprehë zërin e saj në një forum që duhet të jetë mishërim i demokracisë dhe barazisë, atëherë të gjithë ne, si anëtarë të kësaj organizate, jemi të ekspozuar ndaj të njëjtës padrejtësi.
Nëse FSHF nuk mund të flasë, kush tjetër mund të ketë garanci për lirinë e shprehjes dhe të drejtën për përfaqësim?
FSHSU ndan shqetësimin e FSHF-së për drejtimin jo transparent dhe përjashtues të KOKSH, i cili po dëmton funksionimin normal të organizatës dhe po minon besimin midis anëtarëve. Ne besojmë se çdo anëtar duhet të ketë të drejtën e barabartë për të shprehur, për të propozuar dhe për të marrë pjesë në mënyrë aktive në vendimmarrje.
Në këtë frymë, FSHSU njofton se nuk do të marrë pjesë në Asamblenë e 31-të të Përgjithshme të KOKSH, si protestë dhe solidaritet ndaj një procesi të deformuar dhe të padrejtë.
Ne do të vazhdojmë të mbështesim fuqishëm ligjshmërinë, transparencën, kontrollin dhe balancat, si dhe parimin e përfaqësimit të barabartë – si gurë themeltarë për një sistem sportiv të drejtë, të hapur dhe demokratik. -
Albana Vokshi denoncon korrupsionin qeveritar në Asamblenë Parlamentare te KE
Deputetja e PD, Albana Vokshi në Asamblenë Parlamentare te KE deklaron se”Korrupsioni në Shqipëri po vret përmes koncesioneve, PPP-ve dhe kontratave në Shëndetësi! Paratë shkojnë tek oligarkët dhe klientët e qeverisë”.
Ndiq videon e plotë -
‘Demokracia në Shqipëri po cënohet’, Vokshi në Asamblenë Parlamentare të KiE: BE të garantojë zgjedhje të lira
Deputetja demokrate Albana Vokshi ka ngritur shqetësime serioze për situatën e demokracisë në Shqipëri, gjatë fjalës së saj në Asamblenë Parlamentare të Këshillit të Evropës. Ajo kërkoi vëmendje dhe mbështetje nga Bashkimi Evropian për të siguruar zgjedhje të ndershme dhe një proces të barabartë, në kushtet kur Shqipëria synon anëtarësimin në BE.
Vokshi denoncoi ashpër kapjen e drejtësisë dhe proceset e reformave të fundit, duke përmendur lidhjet e kryeministrit Edi Rama me fondacionin e Xhorxh Soros, të cilin e akuzoi për ndikim të drejtpërdrejtë në hartimin dhe zbatimin e reformës në drejtësi dhe asaj zgjedhore.
“Ky fondacion ka qenë i përfshirë në hartimin dhe zbatimin e reformës në drejtësi, reformës zgjedhore dhe çdo reforme tjetër të rëndësishme. Këto procese kërkojnë transparencë dhe analizë urgjente, pasi në vend që të përmirësojnë demokracinë, ato e kanë përkeqësuar atë.”
Duke iu referuar raportit të OSBE/ODIHR, Vokshi tha se zgjedhjet në Shqipëri nuk janë as të lira dhe as të ndershme, ndërsa rekomandimet e dhëna nuk janë zbatuar. Ajo theksoi se përdorimi i administratës publike dhe i aseteve shtetërore nga partia në pushtet për qëllime elektorale ka bërë që gara e 11 majit të mos jetë e barabartë.
“Kemi qenë dëshmitarë të keqpërdorimit të aplikacioneve si ‘Aktivisti’, i përdorur nga Partia Socialiste për propagandë, manipulim të sjelljes së votuesve, intimidim të nëpunësve civilë dhe heshtje të kundërshtarëve politikë.”
Vokshi shtoi se situata bëhet edhe më alarmante në kushtet e një korrupsioni endemik, përkeqësimit të sundimit të ligjit dhe përqendrimit të pushtetit. Ajo kërkoi një plan mbrojtjeje që të përfshijë vendet kandidate si Shqipëria, Moldavia dhe Gjeorgjia, për të parandaluar autokracinë dhe kontrollin e lirisë së shprehjes.
“Vendime si ai i ndalimit të TikTok nga Kryeministri i Shqipërisë, dhe kontrolli i internetit përmes pajisjeve speciale disa javë para zgjedhjeve, janë veprime autokratike dhe minojnë të drejtat themelore.”
Vokshi i bëri thirrje institucioneve ndërkombëtare të mos mbyllin sytë përballë shkeljeve të rënda demokratike në vendin tonë, duke kërkuar mbështetje për të garantuar një proces zgjedhor të ndershëm dhe të barabartë për të gjithë. -
Berisha shkon në Strasburg, vizitë në Asamblenë Parlamentare të KiE
Kryetari i PD, Sali Berisha do të zhvillojë të hënën një vizitë zyrtare në Asamblenë Parlamentare të Këshillit të Europës në Strasburg.
Berisha shoqërohet nga disa prej eksponentëve të PD dhe do të zhvillojë disa takime në Asamblenë Parlamentare të Këshillit të Europës.Kreu i demokratëve do të flasë në këto takime dhe për disa nga pikat kryesore të programit elektoral të koalicionit Aleanca për Shqipërinë Madhështore.
Për shkak të këtij takimi Berisha ka marrë edhe leje nga SPAK, duke mos u paraqitur të hënë e parë të muajit Prill.