Në prag të ndeshjes së kthimit ndaj Arsenalit, pas humbjes 3-0 në “Emirates Stadium”, trajneri i Real Madridit, Carlo Ancelotti, është shfaqur i vendosur dhe optimist përpara gazetarëve në konferencën për shtypin.
“Tifozët janë shumë të rëndësishëm, na kanë ndihmuar shumë. Nesër do të kemi nevojë për një ndeshje të jashtëzakonshme për të ndryshuar fatin e kësaj sfide. Është e komplikuar, por do të përpiqemi të ndryshojmë mentalitetin. Do të luajmë me kokë, me zemër dhe me topin,” u shpreh tekniku italian.
Ancelotti u ndal edhe te veçantia e “Bernabéut”, që shpesh ka përmbysur ndeshje të pamundura:
“Këtu ndodhin gjëra që nuk ndodhin diku tjetër. Kemi cilësi, përkushtim, përvojë dhe mbi të gjitha, tifozët. Kemi dhënë prova në të kaluarën për të përmbysur rezultatet. Tani është momenti të japim më të mirën.”
I pyetur për të ardhmen e tij në krye të Real Madridit, Ancelotti ishte i qartë:
“Nuk mendoj se ajo varet nga rezultati i nesërm. Motivimi është aty. Dua që lojtarët të jenë të qetë dhe të fokusuar. Jam i bindur se do të japim gjithçka.”
Në lidhje me komentet e ish-lojtarit të Atleticos, Thomas Partey, mbi atmosferën në ‘Bernabéu’, italiani u përgjigj me ironi: “Është normale që një kundërshtar ndien presionin këtu. Fusha është e njëjtë, bari ka të njëjtën ngjyrë, por gjithçka tjetër është ndryshe.”
Trajneri mohoi të ketë ndonjë “as nën mëngë”: “Asgjë speciale, thjesht do të përpiqemi të bëjmë një ndeshje intensive.”
Sipas tij, për të përmbysur sfidën, skuadra ka nevojë për “cilësi, përqendrim dhe performancë të plotë – si fizike, ashtu edhe taktike.”
I pyetur për gjendjen e Mbappé-së, pas ndëshkimit në ndeshjen e fundit, Ancelotti u shpreh:
“Është i zhgënjyer, por u stërvit shumë mirë dje. Kemi nevojë për të, jo vetëm për të mbrojtur, por mbi të gjitha për të shënuar.”
Në fund, me nota humori, Ancelotti iu shmang me zgjuarsi pyetjes për rolin e Valverde-s:
“E di se ku do të luajë, por nuk do t’jua them!” – tha ai mes të qeshurash.
