Nëntë muaj pasi dhunoi një efektiv të forcave Shqiponja, Sindi Allushi djali i kryetarit të njësisë numër 12 në Tiranë, Saimir Allushit këtë herë është përfshirë sërish në një konflikt ku ka dhunuar një kushëririn e tij. Ngjarja ka ndodhur paraditen e së martës ku në prani të forcave të policisë ai dhunon kushëririn për një konflikt për çështje pronësie thotë policia. Pasi e ka dhunuar ai është larguar, ndërkohë babai i tij Saimir Allushi ka telefonuar personin e dhunuar duke e kërcënuar. Policia ka shpallur në kërkim Sindi Allushin dhe ka proceduar babain e tij.
Nga SYRI TV
Sindi Allushi djali i Saimir Allushit kryetarit të njësisë administrative numër 12 është kthyer sërish në qendër të vëmendjes, për një konflikt fizik me një kushëririn e tij.
Ngjarja ka ndodhur paraditen e së martës në zonën e Freskut ku Sindi Allushi së bashku me Pajtim Allushi kanë dhunuar dhe një person tjetër.
Siç shikohet dhe nga pamjet ngjarja ka ndodhur në prani të forcave të rendit të komisariatit numër 4. Sindi Allushi dhe Pajtim Allushin godasin me grushte një kushëririn e tyre, konflikt i cili sipas policisë ka ndodhur për motive pronësie. Sindi Allushi është shpallur në kërkim nga policia ndërkohë që Pajtim Allushi është proceduar në gjendje të lirë.
Pas konfliktit në lojë ka hyrë dhe babai Sindi Allushit, kryetari i njësisë administrative numër 12, Saimir Allushi i cili nëpërmjet telefonit ka kërcënuar kushëririn që u konfliktua me djalin e tij.
Blutë thonë se po punohet për kapjen e Sindi Allushit dhe gjetjen e mjetit me të cilin u largua nga vendi i ngjarjes si dhe ka nisur inspektim për një inspektor të komisariatit 4 që nuk ka vepruar.
Në janar të këtij viti, Sindi Allushi u shpall sërish në kërkim nga policia e Tiranës. Shkak u bë dhunimi i një efektivi të forcave Shqiponja në rrugën Siri Kodra. Efektivi i Shqiponjave para disa kohësh e kishte ndaluar djalin e Saimir Allushit dhe e kishte shoqëruar në polici për akuzën e ‘kundërshtimit të punonjësit të policisë’.
Kur e hasi sërish efektivin e Shqiponjave Sindi Allushi e dhunoi si shenjë hakmarrje ndaj efektivit pse e kishte ndaluar dhe shoqëruar kohë më pare dhe si sot u largua nga vendi i ngjarjes.
