Tag: administrata

Administrata Trump po lëviz për të riatdhesuar qindra fëmijë guatemalanë në kujdestarinë qeveritare që mbërritën vetëm në Shtetet e Bashkuara, sipas burimeve të shumta të njohura me planifikimin, të cilët e përshkruan fushëveprimin e përpjekjes si të pashembullt.

Ky është veprimi i fundit në një seri lëvizjesh që nga rikthimi i Presidentit Donald Trump në detyrë, i përqendruar te fëmijët imigrantë të pashoqëruar në Shtetet e Bashkuara, në këtë rast, marrja e fëmijëve nga kujdestaria qeveritare, ku ata presin të lirohen te një i afërm ose kujdestar në SHBA, i cili mund të kujdeset për ta ndërsa ata paraqesin rastin e tyre për mbrojtje dhe dërgimi i tyre në Guatemalë, ku pritet të ribashkohen me familjen.
Administrata ka identifikuar më shumë se 600 fëmijë nga Guatemala në kujdestarinë e Departamentit të Shëndetit dhe Shërbimeve Njerëzore, i cili është i ngarkuar me kujdesin e tyre derisa të lirohen, për t’u deportuar si pjesë e një programi pilot në koordinim me qeverinë e Guatemalës, sipas dy burimeve.
Fëmijë të moshave së ndryshme, besohet se nuk kanë një prind në SHBA, megjithëse mund të kenë një të afërm, tha një nga burimet. Nuk është e qartë se çfarë procesi imigracioni planifikon të përdorë administrata për të larguar fëmijët, megjithëse diskutimet kanë përfshirë largimin vullnetar.
Në nivel të brendshëm, zyrtarët i kanë quajtur largimet riatdhesime dhe jo deportime, thanë burime për CNN, duke nënkuptuar se fëmijët e prekur nuk po largohen në mënyrë të pavullnetshme. Megjithatë, avokatët dhe ish-zyrtarët shprehën skepticizëm në lidhje largimin e tyre, veçanërisht sepse shumë prej tyre nuk kanë avokatë.
Në përgjithësi, fëmijëve në paraburgim nuk u ofrohet mundësia për t’u larguar vullnetarisht dhe ata që e kërkojnë këtë duhet ta kenë të miratuar nga një gjyqtar imigracioni.
“Të kesh rastet e fëmijëve në gjykatën e imigracionit kur ata zgjedhin largimin vullnetar është një mekanizëm mbrojtës,” tha Shaina Aber, drejtoreshë ekzekutive e Qendrës Acacia për Drejtësi, duke shtuar se një gjyqtar imigracioni është aty për të siguruar që fëmija e di se çfarë do të thotë, po bën zgjedhjen me vullnetin e tij të lirë dhe nuk po vihet në rrezik.
Ka pak më pak se 2,000 fëmijë në paraburgim të HHS, sipas të dhënave federale. Shumica e fëmijëve imigrantë të pashoqëruar që mbërrijnë në kufirin jugor të SHBA-së janë nga Guatemala, Hondurasi ose El Salvadori.
CNN kontaktoi HHS dhe Departamentin e Sigurisë Kombëtare për koment. Ambasada e Guatemalës nuk pranoi të komentojë.
Trump dhe ndihmësit e tij janë fiksuar te fëmijët imigrantë ardhur në Shtetet e Bashkuara, duke argumentuar se ata janë në rrezik si dhe kanë kritikuar trajtimin e këtyre fëmijëve nga administrata Biden. Ish-zyrtarë të Biden dhe disa ekspertë i hedhin poshtë këto pretendime.
Administrata Trump ka kryer kontrolle të mirëqenies së fëmijëve imigrantë që banojnë në vend, ka vendosur pengesa shtesë për fëmijët në paraburgim që t’u lirohen prindërve ose të afërmve në SHBA, i ka vendosur fëmijët në procedura të përshpejtuara të imigracionit, ka filluar intervistimin e fëmijëve në paraburgim dhe ka pasur agjentë federalë që u kanë kërkuar disa fëmijëve të hasur në operacionet e zbatimit të ligjit të imigracionit nëse duan të largohen vullnetarisht nga vendi, ndër një sërë masash të tjera.
Ndryshimet e politikave rrjedhin pjesërisht nga bindja midis zyrtarëve të lartë të Trump se procedurat e verifikimit që kanë qenë në fuqi prej vitesh nuk janë të mjaftueshme.
“Fokusi ynë kryesor tani nuk është vetëm të sigurohemi që kufiri të jetë më i sigurti se kurrë më parë, siç është tani, por të gjejmë mijëra e mijëra fëmijë që u trafikuan në këtë vend, të lëshuar te sponsorë të paverifikuar”, tha shefi i kufirit i Shtëpisë së Bardhë, Tom Homan, në një samit në korrik.
Këtë javë, administrata u drejtoi specialistëve federalë të fushës, të cilët shërbejnë si ndërlidhës rajonalë për ofruesit e kujdesit dhe palët e interesuara, që të ndalojnë të gjitha lëshimet e fëmijëve guatemalanë në kujdestarinë e sponsorëve të caktuar, si të afërmit.
Atyre iu tha gjithashtu të ndalonin miratimet e sponsorëve për fëmijët guatemalanë që janë në kujdestarinë e qeverisë dhe nuk kanë një prind në Shtetet e Bashkuara, sipas udhëzimeve të shqyrtuara nga CNN.
“Bllokimi i lëshimeve bazuar vetëm në kombësinë e fëmijës është një shkelje e qartë e ligjit dhe rregulloreve federale që kërkojnë (Zyrën e Rivendosjes së Refugjatëve) të lëshojë fëmijët te një sponsor i përshtatshëm pa vonesa të panevojshme”, tha Neha Desai, drejtoreshë menaxhuese e të Drejtave të Njeriut dhe Dinjitetit të Fëmijëve në Qendrën Kombëtare për Ligjin e të Rinjve.
Ndërsa avokatët e emigrantëve pohojnë se siguria e fëmijëve duhet të jetë një përparësi, veçanërisht kur bëhet fjalë për fëmijë emigrantë të cenueshëm, ata argumentojnë se politikat e administratës Trump rrezikojnë të bëjnë më shumë dëm sesa dobi.
Fëmijët e pashoqëruar që banojnë në SHBA zakonisht u ofrohet mbrojtje e veçantë duke qenë se konsiderohen një popullatë e cenueshme. Ata në përgjithësi vendosen me anëtarë të familjes që tashmë jetojnë në SHBA, por ende konsiderohen të pashoqëruar sepse kanë hyrë në vend vetëm.
Akti i Riautorizimit për Mbrojtjen e Viktimave të Trafikimit, i cili ka qenë në fuqi për më shumë se dy dekada, ofron mbrojtje për fëmijët imigrantë të pashoqëruar që mbërrijnë dhe banojnë në SHBA, duke përfshirë shqyrtimin e tyre për të parë nëse janë viktima të trafikimit të qenieve njerëzore ose kanë një frikë të besueshme nga persekutimi në vendin e tyre të origjinës.
Fëmijëve nga Meksika dhe Kanadaja u është kërkuar të largohen vullnetarisht si pjesë e procesit të largimit përgjatë kufirit jugor të SHBA-së, por kjo nuk ka qenë e vërtetë për fëmijët e kombësive të tjera dhe është e paqartë se si direktivat e fundit përputhen me mbrojtjet e përcaktuara në ligj.
“Sipas përvojës sonë, fëmijët largohen sepse nuk janë të sigurt, kështu që mund të jetë prindi në vendin e origjinës personi që po i dëmtonte, ose mund të keni një prind që nuk është në gjendje t’i mbrojë ata sepse bandat po i ndjekin. Të kesh një prind ose anëtar të familjes në vendin e origjinës nuk do të thotë gjithmonë të kesh një vend të sigurt për t’u kthyer”, tha Jennifer Podkul, shefe e avokimit global për Fëmijët që kanë Nevojë për Mbrojtje, një grup që punon me të mitur emigrantë të pashoqëruar.
CNN raportoi më parë se agjentët federalë ishin udhëzuar t’i pyesnin adoleshentët imigrantë të hasur në SHBA nëse donin të largoheshin nga vendi, duke shënuar një largim nga protokolli i gjatë i cili kërkonte që autoritetet t’i kthenin shumicën e fëmijëve të pashoqëruar në HHS.
Administrata është mbështetur në të ashtuquajturat vetë-deportime si pjesë e fushatës gjithëpërfshirëse të deportimit masiv të Trump. Disa familje, përfshirë ato nga familje me status të përzier, kanë zgjedhur të largohen nga vendi vullnetarisht, nga frika e goditjes së administratës kundër imigracionit. Fëmijët në paraburgim kanë kërkuar gjithashtu më parë të largohen nga vendi.
Ekspertët dhe avokatët e fëmijëve thonë se disa fëmijë në paraburgim janë dëshpëruar dhe zyrtarët kanë pranuar privatisht se disa fëmijë kanë qenë duke vuajtur në paraburgim.
Kohëzgjatja mesatare e kujdesit për fëmijët në paraburgim është rritur nga 67 ditë në dhjetor 2024 në 187 ditë në korrik 2025, ndërsa udhëzimet për lirimin e fëmijëve janë bërë më të rrepta.

Top Channel