SEANCE PLENARE
TIRANË- Pas më shumë se 14 orësh diskutime, Kuvendi mbylli rreth mesnatës seancën maratonë, me miratimin e 13 projektligjeve dhe 2 projektvendimeve, të cilat përfshijnë një sërë marrëveshjesh ndërkombëtare dhe ratifikimesh financiare për projektet hekurudhore të Korridorit VIII, aderimin në traktate dhe memorandume ndërkombëtare, ndryshime në ligjet e sektorit minerar, shëndetit publik, integrimit europian dhe funksionimit të Avokatit të Popullit, si edhe një ligj të ri që rregullon përgjegjësitë e zgjeruara të prodhuesve për menaxhimin e mbetjeve.
Në nisje të punimeve të seancës, Kryeparlamentari Niko Peleshi, njoftoi shtyrjen e paraqitjes së Raportit të veprimtarisë së Komisionit Qendror të Zgjedhjeve për vitin 2024.
Peleshi rrëzoi gjithashtu për kërkesën e kryetarit të Grupit Parlamentar të PD-së, Gazment Bardhi, për një interpelancë urgjente me kryeministrin Edi Rama mbi ankimin e këtij të fundit në Kushtetuese të vendimit të GJKKO-së për pezullimin e Ministres për Infrastrukturën dhe Energjinë, njëherësh zv.kryeministren Belinda Balluku, kërkesë që u rrëzua me 74 vota kundër dhe 17 pro.
Po me kaq vota u rrëzua edhe propozimi i deputetit Eno Bozdo për heqjen nga rendi i ditës të projektligjit që lidhet me përgjegjësitë e zgjeruara të subjekteve prodhuese të produkteve që gjenerojnë mbetje.
Në seancë u shqyrtua edhe projektligji që fuqizon rolin mbikëqyrës të Kuvendit në procesin e integrimit europian, si dhe projektligji që parashikon përmirësime në funksionimin dhe kompetencat e institucionit të Avokatit të Popullit.
Në rendin e ditës ishin edhe tre projektvendime, ndër të cilat zgjedhja e Komisionerit për Mbikëqyrjen e Shërbimit Civil. Komisioni për Çështjet Ligjore dhe Administratën Publike ka kualifikuar Lefterije Lleshin si kandidaten e vetme që plotëson kriteret dhe kushtet ligjore për këtë pozicion.
Teksa për pikën e Avokatit të Popullit, palët patën dakortësinë, ndryshe ndodhi për projektligjin për disa ndryshime në ligjin “për Rolin e Kuvendit në procesin e Integrimit në BE”, ku PD paralajmëroi bojkotimin e punimeve të Këshillit Kombëtar të Integrimit.
Sipas demokratëve, është hera e parë që një projektvendim i tillë vjen në Kuvend pa u konsultuar me opozitën. Gazment Bardhi tha se Taulant Balla është në konflikt interesi, pasi propozon veten e tij si bashkëkryetar.
“Ju e nisët këtë legjislaturë duke shkrirë Komisionin e Integrimit, vetëm për t’i hequr opozitës rolin thelbësor që ka në procesin e integrimit. Po na e shisni këtë projektligj sikur po i jepni opozitës një rol si bashkëdrejtuese në Këshillin e Integrimit, kur në fakt opozita historikisht ka patur drejtimin.
Nëse ka një ligj që propozohet në konflikt interesi, është ky. Taulant Balla propozon të bëjë veten bashkëkryetar të Këshillit të Integrimit. Në emër të grupit të PD, po e deklaroj këtu: Ky është Këshilli juaj. Ne nuk marrim më pjesë në Këshillin e Integrimit”, u shpreh Bardhi para votimit.
Adela Xhemaili u zgjodh anëtare e bordit të Autoritetit të Mbikëqyrjes Financiare dhe do të jetë Drejtori i Përgjithshëm Ekzekutiv.
Lefterije Lleshi Luzi u zgjodh Komisionere për Mbikëqyrjen e Shërbimit Civil me mandat 5-vjeçar.
Pas debatit procedural, Kuvendi vijoi me miratimin e projektligjeve, për të cilat u regjistruan këto rezultate votimi:
Projektligji “Për denoncimin e marrëveshjes së bashkëpunimit, ndërmjet Këshillit të Ministrave të Republikës së Shqipërisë dhe fondacionit HannsSeidel të Republikës Federale të Gjermanisë, ratifikuar me ligjin nr. 9781, datë 19.7.2007”, u miratua me 79 vota pro, 21 abstenim dhe 0 kundër.
Projektligji “Për aderimin e Republikës së Shqipërisë në Traktatin e Marrakeshit për lehtësimin e aksesit në veprat e botuara për personat e verbër, me vështirësi në shikim ose me aftësi të kufizuara në leximin e teksteve të shtypura, bërë në Marrakesh, më 27.6.2013”, u miratua me 100 vota pro, 0 abstenim dhe 0 kundër.
Projektligji “Për pranimin e ndryshimeve të Statutit të Romës për Gjykatën Ndërkombëtare Penale, për krimin e agresionit, ratifikuar me ligjin nr. 8984, datë 23.12.2002”, u miratua me 102 vota pro, 0 abstenim dhe 0 kundër.
Projektligji “Për aderimin e Republikës së Shqipërisë në memorandumin e mirëkuptimit për kontrollin shtetëror portual në Rajonin e Mesdheut, bërë në Maltë, më 11 korrik 1997”, u miratua me 100 vota pro, 0 abstenim dhe 0 kundër.
Projektligji “Për ratifikimin e marrëveshjes së grantit, ndërmjet Republikës së Shqipërisë dhe Bankës Evropiane për Investime, për projektin “Infrastruktura hekurudhore e korridorit VIII, faza I – Shqipëri””, u miratua me 79 vota pro, 0 abstenim dhe 21 kundër.
Projektligji “Për ratifikimin e kontratës financiare, ndërmjet Republikës së Shqipërisë dhe Bankës Evropiane për Investime, për projektin “Infrastruktura hekurudhore e korridorit VIII, faza I – Shqipëri”, u miratua me 79 vota pro, 0 abstenim dhe 21 kundër.
Projektligji “Për ratifikimin e marrëveshjes së huas, ndërmjet Republikës së Shqipërisë dhe Bankës Evropiane për Rindërtim dhe Zhvillim, për projektin “Korridori hekurudhor VIII, faza I – seksioni Durrës – Rrogozhinë””, u miratua me 79 vota pro, 0 abstenim dhe 21 kundër.
Projektligji “Për ratifikimin e marrëveshjes së garancisë, ndërmjet Republikës së Shqipërisë dhe Bankës Evropiane për Rindërtim dhe Zhvillim (BERZH), për marrëveshjen e huas, ndërmjet Korporatës Elektroenergjetike Shqiptare, sh.a., (KESH, sh.a.) dhe Bankës Evropiane për Rindërtim dhe Zhvillim (BERZH), për projektin fotovoltaik (FV) solar nga 2 KESH-i”, u miratua me 79 vota pro, 0 abstenim dhe 22 kundër.
Projektligji “Për përgjegjësitë e zgjeruara të subjekteve prodhuese të produkteve që gjenerojnë mbetje”, u miratua me 79 vota pro, 0 abstenim dhe 23 kundër.
Projektligji “Për disa ndryshime dhe shtesa në ligjin nr. 10304, datë 15.7.2010 “Për sektorin minerar në Republikën e Shqipërisë”, të ndryshuar”, u miratua me 78 vota pro, 0 abstenim dhe 23 kundër.
Projektligji “Për disa ndryshime dhe shtesa në ligjin nr. 95/2015, “Për shërbimet dhe produktet biocide në shëndetin publik”, të ndryshuar”, u miratua me 79 vota pro, 0 abstenim dhe 24 kundër.
Projektligji “Për disa shtesa dhe ndryshime në ligjin nr. 15, datë 5.3.2015 “Për rolin e Kuvendit në procesin e integrimit të Republikës së Shqipërisë në Bashkimin Europian” i ndryshuar”, u miratua me 79 vota pro, 0 abstenim dhe 23 kundër.
Projektligji “Për disa shtesa dhe ndryshime në ligjin nr. 8454, datë 4.2.1999 “Për Avokatin e Popullit”, të ndryshuar”, u miratua me 101 vota pro, 0 abstenim dhe 0 kundër.
Në seancë plenare u miratuan gjithashtu edhe dy projektvendime, më konkretisht;
Projektvendimi “Për emërimin e anëtarit të Bordit të Autoritetit të Mbikëqyrjes Financiare, që do të mbajë funksionin e Drejtorit të Përgjithshëm Ekzekutiv të Autoritetit”, u miratua me 78 vota pro, 2 abstenim, 22 kundër. Kuvendi voton pro Adela Xhemalit në këtë funksion.
Projektvendimi “Për zgjedhjen e Komisionerit për Mbikëqyrjen e Shërbimit Civil”, u miratua me 79 vota pro, 1 abstenim dhe 4 kundër. Lefterie Lleshi Luzi zgjidhet komisionere për Mbikëqyrjen e Shërbimit Civil për një mandat 5-vjeçar.
