U hodh shorti i “final four”, ku do të përcaktohet tituli kampion i Superiores. Egnatia do të përballet me Partizanin në gjysmëfinale, ndërsa Vllaznia me Dinamo City. I pranishëm gjatë shortit, presidenti i FSHF-së, Armand Duka, u shpreh për mediat:
“Skuadrat kanë dhuruar emocione për të gjithë spektatorët. Falënderoj drejtuesit e klubeve, stafet përkatëse teknike dhe lojtarët. Iu uroj shumë suksese. Dëshiroj të dalin të 4 skuadrat kampione, por është e pamundur. Kështu, fitoftë më i miri!
Presidentët që janë sot prezent, a do të jenë në finale? Në finale shkojnë skuadrat dhe kjo na jep emocione të mëdha. Duke qenë se ende nuk dihet se kush do të mund ta fitojë titullin, kjo na mban më të motivuar. Ne duhet ta shijojmë ‘final four’, duhet të shohim rezultatet e tij dhe pastaj të vazhdojmë për sezonin tjetër, të bëjmë çdo gjë gati.
Arbitra të huaj në finale? Është diçka shumë e diskutuar në klubet shqiptare. Për mua, arbitrat në Shqipëri janë në nivelin maksimal dhe i përgjigjen më së miri edhe nivelit tonë. Tani në ‘final four’ do të gjykojnë 4 gjyqtarët e FIFA-s, që kemi. Ai që do të jetë në gjysmëfinalen e parë nuk do të gjykojë dot në finalen e madhe.
Kështu, me short do të vendosim se kush do të mund të gjykojë. Sot duhen 7 gjyqtarë, të tjerët do të jenë në pozicione të tjera. Ne kemi zgjedhur një nga arbitrat më të mirë të globit, polakun Szymon Marciniak për të pasur sa më pak aludime për fituesin”.
Duka: Finalen e “fina four” për titullin kampion do ta gjykojë polaku Marciniak
