Day: June 4, 2025

Adriatik BALLA
Armando Brojës nuk po i ndahen hijet e zeza të dëmtimeve, të cilat në vitet e fundit e kanë lënë disi mënjanë, duke mos e lejuar të shfaqet në kapacitetin e vet maksimal dhe pavarësisht se i është dhënë shansi të luajë në ekipet ku është huazuar, fati ndonjëherë nuk ka qenë me të në momentet më të mira. Gjithsesi, shqiptari nuk heq dorë lehtë. Ai dëshiron të lerë gjurmë. Cilësitë e tij nuk vihen në diskutim dhe këtë e kanë të qartë edhe klubet ku ka luajtur e interesohen për të dhe së fundmi ka marrë interesim nga klube të mëdha në Itali e në Angli.
Ofertat në treg
Referuar mediave sportive, për sulmuesin kuqezi ka një interesim të shtuar që në momentin kur klubi i Çelsit vendosi ta nxjerrë atë lojtar të lirë dhe madje t’i ulë çmimin e transferimit, pasi nuk është pjesë e projektit të bluve të Londrës për sezonin në vazhdim. E pranojnë edhe analistët anglezë të futbollit se Armando Broja nuk ka kaluar sezonin më të mirë të karrierës së tij në radhët e Evertonit, pasi për shkak dëmtimesh është aktivizuar ame “pikatore”. Por kërkesat për sulmuesin që do të largohet nga Çelsi nuk mungojnë. Britanikja “The Sun” bën të ditur se Broja është në radarët e klubeve shumë të njohur, me katër skuadra europiane të cilat kanë nisur bisedimet me sulmuesin e Kombëtares shqiptare për të siguruar transferimin e tij në verë.
“Burime i kanë treguar “SunSport” se Milani dhe Ajaksi kanë qenë të dyja në kontakt para asaj që do të jetë një verë shumë e zënë me punë te Çelsi. Bisedime me holandezët e PSV dhe gjermanët e Lajpcig janë zhvilluar që më parë”, shkruhet në portalin e tabloidit të njohur britanik. Sipas tij, Çelsi kërkon tashmë një shifër prej rreth 20 milionë paund për sulmuesin shqiptar, i cili bëhet e ditur se ka insistuar që këtë verë transferimi i tij të jetë përfundimtar pasi nuk dëshiron të jetë më vazhdimisht në huazim, ndonëse ka kontratë me blutë deri në vitin 2028.
Dëmtimi alarm fals, rezonanca nxori Brojën “ok”
Ndërsa gjendja e grupit kuqezi duket e mirë, një situatë e pakëndshme të hënën duket se shërbeu si alarm në lidhje me Brojën. Për momentin, të gjithë lojtarët duken në formë të mirë, por pak ditë më parë, në kampin kuqezi kishte alarm për situatën e Armando Brojës. Këtë e ka treguar përgjegjësi i zyrës për marrëdhëniet me publikun në FSHF, Fatjon Kodra. “Broja ka pasur një problem muskulor. Ka bërë rezonance, por për fat të mirë ka rezultuar negative. Ai ka marrë pjesë normalisht me grupin, është stërvitur rregullisht, kështu që deri tani është alarm fals”, tha Kodra për “Klan Neës”, duke zbuluar situatën e sulmuesit kuqezi para kësaj ndeshje delikate të kualifikueseve të Botërorit. Broja do të synojë të luajë ndaj Serbisë për të rritur kuotat e tij në treg. Një gol do ta ndihmonte shumë, për të mos thënë se do t’i hapte rrugën për gjetjen e një skuadre të madhe në top-ligat europiane. Cilësitë nuk mungojnë, ndaj Broja ka shansin e artë të tregojë vlerat e veta në këto dy takime eliminatore të Botërorit për Shqipërinë.