Lajmidites.com

Day: June 4, 2025

  • Lufta në Ukrainë, Gjermania kërkon më shumë sanksione ndaj Rusisë

    Lufta në Ukrainë, Gjermania kërkon më shumë sanksione ndaj Rusisë

    Gjermania ka kërkuar sanksione të reja ndaj Rusisë, duke theksuar se masat duhet të koordinohen me qeverinë e Trump.

    Ministri i jashtëm gjerman Johann Wadephul tha se bisedimet midis Rusisë dhe Ukrainës në Turqi ishin shqetësuese dhe sugjeroi se Vladimir Putin do të pranonte paqe që është tërësisht në favor të tij.
    “Ajo që përjetuam në bisedimet e fundit në Stamboll është tronditëse”, tha Wadephul në një konferencë.

    Ai shtoi: “Pala ruse nuk paraqiti asgjë më shumë sesa kërkesat maksimale të njohura. Një gatishmëri për t’u angazhuar në dialog duket ndryshe. Ne po shtyjmë përpara një paketë me 18-të sanksionesh sa më shpejt të jetë e mundur.”
    Më tej nënvizoi se kancelari gjerman Friedrich Merz do t’i çojë Trumpit një mesazh se Evropa është e vendosur në anën e Ukrainës dhe se asnjë shans për paqe nuk duhet të humbasë.
    “Evropa pret që ne, Shtetet e Bashkuara dhe Evropa, ta sjellim Rusinë në tryezën e negociatave. Kjo mundësi për paqe nuk duhet humbur. Dhe kjo luftë duhet të marrë një fund të drejtë”, tha ai.

  • Lufta në Ukrainë/ Zbardhet biseda e Papës me Putinin, Leoni XIV: Dialogu, rruga për zgjidhjen e konfliktit

    Lufta në Ukrainë/ Zbardhet biseda e Papës me Putinin, Leoni XIV: Dialogu, rruga për zgjidhjen e konfliktit

    Presidenti rus Vladimir Putin zhvilloi të mërkurën një bisedë telefonike me Papa Leoni XIV.

    Sipas mediave të huaja biseda u zhvillua kryesisht te situata në Ukrainë.
    Sipas njoftimit zyrtar të Kremlinit, Putin e përgëzoi Papën për zgjedhjen dhe i uroi suksese në detyrën e tij, duke e cilësuar “një mision fisnik”.
    Kreu i Kremlinit vlerësoi gjithashtu kontributin e Papa Françeskut në marrëdhëniet ndërmjet Rusisë dhe Vatikanit, duke shprehur shpresën se këto lidhje do të vijojnë të forcohen edhe me Leoni XIV.
    Gjatë bisedës, të dy liderët diskutuan për mundësitë e bashkëpunimit në fushat kulturore, humanitare, si dhe për mbrojtjen e komuniteteve dhe faltoreve të krishtera në zonat e konfliktit.
    Në qendër të diskutimit ishte lufta në Ukrainë ndërsa Putin ritheksoi interesin e tij për arritjen e paqes përmes mjeteve politike dhe diplomatike, duke theksuar rëndësinë e adresimit të “shkaqeve rrënjësore të konfliktit”.
    Nga ana tjetër, sipas Vatikanit, Papa i kërkoi Rusisë të ndërmarrë hapa konkrete për të mbështetur paqen në konfliktin me Ukrainën.
    Ai theksoi rëndësinë e dialogut si rrugë për zgjidhjen e konfliktit.

    Top Channel

  • Telefonata Trump-Putin, nuk vonon reagimi i Zelenskyt: Nëse të fuqishmit nuk e ndalojnë presidentin rus, ndajnë përgjegjësinë me të

    Telefonata Trump-Putin, nuk vonon reagimi i Zelenskyt: Nëse të fuqishmit nuk e ndalojnë presidentin rus, ndajnë përgjegjësinë me të

    Ka ardhur reagimi nga Volodymyr Zelensky pas telefonatës së zhvilluar pasditen e së mërkurës mes presidentit amerikan Donald Trump dhe atij rus Vladimir Putin, e cila zgjati plot një orë e 15 minuta.

    “Faktet janë kokëforta dhe që nga fillimi i këtij viti, Rusia ka kryer një numër të paprecedentë sulmesh ndaj Ukrainës”, shprehet presidenti ukrainas në një postim në X.
    “Sipas autoriteteve ukrainase, vetëm në gjysmën e parë të vitit, ushtria ruse ka lëshuar rreth 27,700 bomba ajrore, përdorur 11,200 dronë kamikazë Shahed, 9,000 UAV të tjerë sulmues, si dhe mbi 700 raketa, përfshirë edhe raketat balistike.
    Me çdo sulm të ri dhe me çdo vonesë të diplomacisë, Rusia po i drejton gishtin botës. Të gjithë atyre që ende hezitojnë të rrisin presionin ndaj saj,” thuhet në mesazhin e postuar në X të presidentit Zelensky teksa shton se nëse nuk e ndaloni, atëherë ndani përgjegjësinë me të. Dhe nëse doni, por nuk mundeni, atëherë ai nuk do t’ju shohë më si të fuqishëm.

    Top Channel

  • Konfirmohet rasti i parë i murtajës tek kafshët në Shqipëri, preket ferma e dhive në Shkodër

    Konfirmohet rasti i parë i murtajës tek kafshët në Shqipëri, preket ferma e dhive në Shkodër

    Konfirmohet rasti i parë i murtajës tek kafshët në Shqipëri.

    Rasti është identifikuar në një fermë të mbarështimit të caprinëve (dhi) në njësinë administrative Postribë, qarku Shkodër.
    Mostrat e marra në terren nga Shërbimi Veterinar janë analizuar nga laboratori referencë i Instituti i Sigurisë Ushqimore dhe Veterinarisë, i cili ka konfirmuar praninë e virusit PPR.
    Pas konfirmimit të rastit, janë ndërmarrë menjëherë të gjitha masat e parashikuara në legjislacionin përkatës dhe në Planin Kombëtar të Kontigjencës për PPR, me qëllim kontrollin, izolimin dhe menaxhimin efektiv të situatës në terren.
    𝐔𝐝𝐡ë𝐳𝐢𝐦𝐞 𝐩ë𝐫 𝐦𝐛𝐚𝐫ë𝐬𝐡𝐭𝐮𝐞𝐬𝐢𝐭 𝐞 𝐤𝐚𝐟𝐬𝐡ë𝐯𝐞 𝐭ë 𝐢𝐦𝐭𝐚
    U bëjmë thirrje të gjithë fermerëve dhe mbarështuesve të kafshëve të imta (dele dhe dhi) që të zbatojnë masat parandaluese dhe të kufizojnë lëvizjen e kafshëve brenda dhe jashtë fermave. Në çdo rast të shfaqjes së simptomave të dyshimta, si temperaturë e lartë, rrjedhje nazale, inflamacion i syve, ulje e oreksit, diarre apo ngordhje e papritur, duhet të njoftohet menjëherë Shërbimi Veterinar Rajonal përkatës ose të kontaktohet numri i gjelbër falas: 0800 3366.
    𝐒𝐪𝐚𝐫𝐢𝐦 𝐩ë𝐫 𝐩𝐮𝐛𝐥𝐢𝐤𝐮𝐧
    Theksojmë se Murtaja e Ruminantëve të Vegjël nuk është sëmundje zoonotike, pra nuk transmetohet tek njerëzit dhe nuk paraqet asnjë rrezik për shëndetin publik.
    Autoriteti Kombëtar i Veterinarisë dhe Mbrojtes së Bimëve, në bashkëpunim me strukturat përkatëse, do të vijojë ndjekjen e situatës me seriozitet dhe do të informojë publikun në mënyrë të vazhdueshme për çdo zhvillim.

    Top Channel

  • Aksident në Fier, makina përplaset me mjetin bujqësor, plagosen tre persona

    Aksident në Fier, makina përplaset me mjetin bujqësor, plagosen tre persona

    Një aksident ka ndodhur mbrëmjen e sotme në aksin Fier- Seman, në vendin e quajtur Fermë- Çlirim.

    Një automjet është përplasur me një mjet bujqësor tip zetor dhe si pasojë e përplasjes së fortë kanë mbetur të lënduar tre persona.
    Ata janë transportuar drejt Spitalit Rajonal Fier, ku ndodhen nën kujdesin e mjekëve, jashtë rrezikut për jetën.
    Ndërkohë policia dhe grupi hetimor ndodhen në vendngjarje për të zbardhur dinamikën e aksidentit në fjalë.

    Top Channel

  • Sokol Sadushi po krijon ‘skemë korporatizimi’ në drejtësi/ Synohet ndërprerja antikushtetuese e mandatit të gjyqtares Sonila Bejtja

    Sokol Sadushi po krijon ‘skemë korporatizimi’ në drejtësi/ Synohet ndërprerja antikushtetuese e mandatit të gjyqtares Sonila Bejtja

    Emisioni “Plug” zbuloi në puntatën e së mërkurës një skemë puçi kushtetues, me qëllim rrëmbimin e mandateve të gjyqtarëve të Gjykatës Kushtetuese dhe krijimin e një strukture të re korporative në sistemin e drejtësisë.

    Një sërë dokumentesh zyrtare dëshmojnë se figura qendrore e këtij skenari është Sokol Sadushi, kryetar i Gjykatës së Lartë dhe aktualisht drejtues i Këshillit të Emërimeve në Drejtësi për vitin 2025.

    Në qendër të kësaj skeme është përpjekja për të krijuar kushtet që Sokol Sadushi, në rolin e tij si kryetar i KED-it, të përzgjedhë tre emra të rinj për në Gjykatën Kushtetuese: pasuesin e gjyqtares së dorëhequr Elsa Toska, zëvendësuesin e gjyqtares me mandat të përfunduar Holta Zaçaj dhe gjyqtarin që do të marrë vendin e Sonila Bejtjas, për të cilën synohet ndërprerja antikushtetuese e mandatit.

    Sadushi nxiti një kërkesë të diskutueshme nga Presidenti Bajram Begaj, duke përfshirë mandatin e Bejtjas në skemën e rotacionit 3-vjeçar për përbërjen e Gjykatës Kushtetuese – një interpretim që bie ndesh me frymën dhe shkronjën e Kushtetutës.

    Të gjitha dokumentet zyrtare konfirmojnë se Sonila Bejtja nuk përfshihet në këtë skemë rotacioni. Kushtetuta parashikon qartë se mandatet e përkohshme i takojnë vetëm atyre gjyqtarëve që kanë zëvendësuar paraardhësit e tyre, të cilëve u përfundoi mandati përkatësisht në vitet 2017 dhe 2020 – përkatësisht Holta Zaçaj dhe Sandër Beci.

    Ndërkohë, gjyqtarja Bejtja është emëruar në vend të një gjyqtari që kishte përfunduar mandatin në vitin 2016. Ajo është caktuar në detyrë për një mandat të plotë, fakt ky i dokumentuar si nga Këshilli i Emërimeve në Drejtësi, gjatë kohës që drejtohej nga Ardian Dvorani, ashtu edhe nga Presidenti i asaj kohe, Ilir Meta.

    Një parim i njohur në jurisprudencë është: “Ajo që nuk e ka bërë Kushtetuta, nuk mund ta bëjnë organet e tjera.”

    Megjithatë, Sokol Sadushi, me mbështetjen e Presidentit Bajram Begaj, po synon të bëjë pikërisht atë që Kushtetuta nuk e ka parashikuar – ndërprerjen e një mandati kushtetues në mënyrë të njëanshme dhe antikushtetuese.

    Qëllimi përfundimtar është që Sadushi të ketë kontrollin mbi përzgjedhjen e tre gjyqtarëve të rinj të Gjykatës Kushtetuese, përpara përfundimit të mandatit të tij si kryetar i KED-it në dhjetor të vitit 2025.

    Dhjetë vjet pas miratimit të Reformës në Drejtësi, jemi në prag të një realiteti të ri: një “shtet i Sokol Sadushit”, ku skemat antikushtetuese dhe të centralizuara synojnë të krijojnë një korporatë të drejtësisë – të kontrolluar nga pak duar.

     

  • Zakonet e mëngjesit që mund t’ju ndihmojnë të humbni peshë

    Zakonet e mëngjesit që mund t’ju ndihmojnë të humbni peshë

    Nëse po përpiqeni të humbni peshë, ajo që hani dhe sa lëvizni gjatë ditës luajnë një rol kyç. Megjithatë, disa zakone të mëngjesit mund ta përshpejtojnë më tej procesin e humbjes së peshës dhe të përmirësojnë shëndetin tuaj të përgjithshëm.

    Duke zbatuar disa rutina të thjeshta çdo mëngjes, mund të bëni një hap të madh drejt qëllimit tuaj.

    Konsumi i moderuar i kafesë në mëngjes mund të ketë një efekt pozitiv në trupin tuaj. Kafeina stimulon natyrshëm trupin të djegë më shumë kalori, gjë që mund të ndihmojë në uljen e peshës trupore. Përveç kësaj, kafeja mund të rrisë energjinë dhe motivimin për aktivitet fizik gjatë gjithë ditës.

    Mëngjesi duhet të jetë i pasur me proteina, pasi vakte të tilla ofrojnë një ndjesi ngopjeje më të gjatë. Proteinat treten më ngadalë, që do të thotë se nuk do të keni uri aq shpejt, dhe gjithashtu ndihmojnë në kontrollin më të mirë të oreksit tuaj dhe stabilizimin e sheqerit në gjak. Në vend të pastave ose ëmbëlsirave klasike, zgjidhni vezë, kos, gjizë ose burime proteinash me bazë bimore.

    Të kalosh kohë jashtë në mëngjes ka më shumë përfitime nga sa mund të mendosh. Një shëtitje e shkurtër, qoftë edhe dhjetë minuta, mund të ketë një efekt pozitiv në metabolizëm dhe rregullimin e peshës. Gjithashtu, ekspozimi ndaj dritës natyrale herët në mëngjes ndihmon në krijimin e një ritmi të shëndetshëm gjumë-zgjim, i cili është i rëndësishëm për ruajtjen e një peshe të shëndetshme trupore.

    Ushtrimet menjëherë pas zgjimit mund t’ju ndihmojnë të digjni më shumë kalori gjatë ditës dhe t’ju ndihmojnë të kontrolloni më lehtë marrjen e ushqimit. Ushtrimet herët në mëngjes jo vetëm që përshpejtojnë metabolizmin tuaj, por edhe ju përgatitin mendërisht për pjesën tjetër të ditës, duke rritur fokusin dhe produktivitetin.

    Duke zbatuar këto zakone të thjeshta por efektive në mëngjes, mund të përmirësoni ndjeshëm shanset tuaja për humbje të suksesshme në peshë.

     

  • Deputetja gjermane përjashtohet nga salla për bluzën me mbishkrimin ‘Palestinë’

    Deputetja gjermane përjashtohet nga salla për bluzën me mbishkrimin ‘Palestinë’

    Një incident i pazakontë ndodhi të mërkurën në Bundestagun gjerman, ku deputetja e Partisë së Majtë, Cansin Köktürk, u përjashtua nga salla plenare për shkak të veshjes së saj. Ajo mbante një bluzë me fjalën “Palestinë”, gjë që u konsiderua një deklaratë politike nga udhëheqja e parlamentit. Presidentja e Bundestagut, Julia Klöckner, ndërhyri duke e kujtuar se rregullat e institucionit ndalojnë shprehjet politike përmes veshjeve gjatë seancave zyrtare.

    “Ne kemi rënë dakord dhe këto janë rregullat e qarta të Dhomës”, deklaroi Klöckner. Ajo shtoi se i kishte kërkuar Köktürkut të ndryshonte bluzën në mënyrë diskrete, por meqë deputetja refuzoi, iu kërkua të largohej nga salla. Klöckner theksoi se as ngjitëset dhe as mbishkrimet në rroba nuk lejohen në seancat plenare.

    Ky nuk është rasti i parë që deputetja Köktürk tërheq vëmendjen për shprehjet e saj vizuale në parlament. Në ditën e saj të parë si anëtare e Bundestagut, ajo ishte paraqitur me një shall që ngjante me qeffiye palestineze, duke ngjallur reagime nga përfaqësues të CDU-së konservatore.

    Pas përjashtimit të saj, Köktürk reagoi në platformën X, duke kritikuar ashpër qëndrimin e Bundestagut dhe vendimin e Klöckner. “Gjermania do të vazhdojë të furnizojë me armë Izraelin. Asnjë fjalë për mbi 50,000 fëmijë të vdekur dhe të plagosur… Ju të gjithë keni dështuar keqas”, shkroi ajo.

    Megjithëse Bundestagu nuk ka një kod të detajuar veshjeje, rregullat e tij kërkojnë që anëtarët të vishen në përputhje me dinjitetin e institucionit, dhe zbatimi i këtij standardi i lihet në diskrecionin e drejtuesve të seancave. Në të kaluarën janë shënuar raste të tjera të ngjashme, përfshirë ndalimin e një vizitoreje për bluzën me slogan pro-refugjatëve në 2017 dhe përjashtimin e një studenti në 2009 për një bluzë me mesazh paqeje.

    Kohët e fundit, edhe deputeti Marcel Bauer është përjashtuar dy herë për shkak të refuzimit për të hequr beretën e zezë në sallën plenare, një tjetër rast që nënvizon rregullat e rrepta mbi veshjen në Bundestag.

  • ‘Larg duart nga monedha jonë!’/ Protesta në Bullgari, qytetarët kundër kalimit në euro

    ‘Larg duart nga monedha jonë!’/ Protesta në Bullgari, qytetarët kundër kalimit në euro

    Mijëra qytetarë protestuan në rrugët e Sofjes kundër planit të qeverisë për kalimin e Bullgarisë në eurozonë. Protestuesit, të organizuar nga partia e djathtë ekstreme “Ringjallja”, mbanin flamuj kombëtarë dhe pankarta me mbishkrimin “Larg duart nga monedha jonë!”, duke shfaqur kundërshtimin e tyre ndaj zëvendësimit të levës me euron.
    Tensionet u reflektuan edhe në parlament, ku deputetët e “Ringjalljes” bllokuan foltoren dhe përshkallëzuan situatën me përplasje fizike. Një nga udhëheqësit e kësaj partie, Tsoncho Ganev, shtyu deputetin Yavor Bozhankov nga partia “Vazhdojmë Ndryshimin”, duke shkaktuar kaos në sallën plenare.
    Këto zhvillime pasojnë miratimin nga Komisioni Europian dhe Banka Qendrore Europiane të raportit të konvergjencës që konstaton se Bullgaria i ka përmbushur kushtet ekonomike për të hyrë në eurozonë në fillim të vitit 2026. Me këtë hap, Bullgaria do të bëhej vendi i 21-të anëtar i zonës së përbashkët monetare.
    Pavarësisht përpjekjeve për integrim që prej hyrjes në BE në vitin 2007, mbështetja publike për euron ka rënë ndjeshëm. Sipas sondazhit të fundit të Eurobarometrit, rreth gjysma e bullgarëve shprehen skeptikë për adoptimin e monedhës së përbashkët, duke ngritur shqetësime për ndikimin e saj në rritjen e çmimeve.

  • 46 mijë shqiptarë kontribuojnë për pension privat

    46 mijë shqiptarë kontribuojnë për pension privat

    Tregu i pensioneve private vullnetare u rrit më tej në tremujorin e parë të këtij viti.Të dhënat e nga Autoriteti i Mbikëqyrjes Financiare (AMF) tregojnë se tregu iu afrua kufirit të 46 mijë anëtarëve. Gjatë tremujorit të parë të vitit, numri i anëtarëve të fondeve arriti në 46 337 anëtarë, në rritje me 3.3% që nga fillimi i këtij viti dhe me 16.3% krahasuar me të njëjtën periudhë të vitit të kaluar.Numri i individëve pjesëmarrës në fondet private të pensioneve po rritet me ritme të qëndrueshme dhe është në nivelet më të larta historike. Megjithatë, depërtimi i këtyre skemave në shoqëri ngelet ende shumë modest. Numri i individëve që kontribuojnë për një pension privat ngelet në afërsisht 3% të numrit të përgjithshëm të të punësuarve në vend, çka tregon një nivel ende shumë të ulët të mbulimit me fonde private të pensioneve.Vlera e aseteve neto të fondeve të pensionit në fund të muajit mars arriti në 13.36 miliardë lekë, në rritje me 3.8% që nga fillimi i vitit dhe me 88.4% krahasuar me të njëjtën periudhë të vitit të kaluar. Asetet e fondeve të pensioneve janë të investuara kryesisht në obligacione të qeverisë shqiptare. Tregu i fondeve private ngelet ende segmenti më i vogël i tregut financiar në Shqipëri.Në fund të tremujorit të parë, në treg ishin aktive gjashtë fonde të pensioneve private, që administrohen nga katër shoqëri administruese.Sipas numrit të anëtarëve, aktori më i madh në treg është Credins Pension, me rreth 42.13% të numrit të përgjithshëm të anëtarëve, i ndjekur nga Sigal Pension me 34.84%, Raiffeisen Pension me 10.35%, Albsig Pension me 10%, Smart Pension, me 1.4% dhe Sigal Pro, me 1.27%.Për nga vlera e aseteve neto, fondi më i madh është Sigal Pension me 38.54% të totalit, i ndjekur nga Credins Pension, me 30.71%, Raiffeisen Pension, me 20.49%, Albsig Pension me 8.88%, Smart Pension, me 0.97% dhe Sigal Pro, me 0.4%.Ligji i ri “Për fondet e pensionit privat” ka sjellë rritje të ndjeshme të incentivave fiskale për kontributet në fondet private të pensioneve.Kufiri maksimal mujor i përjashtimit tatimor do të rritet deri në nivelin e pagës minimale të miratuar, që aktualisht ka arritur në 40 mijë lekë në muaj. Me nivelin aktual të pagës minimale, shuma e kontributeve e përjashtuar nga tatimet do të arrinte sot në 480 mijë lekë në vit ose 140% më shumë krahasuar me pragun aktual prej 200 mijë lekësh. Edhe kontributet e pensionet privat të derdhura nga punëdhënësi në favor të punëmarrësit do të përjashtohen nga tatimi në të njëjtën masë.Ligji gjithashtu parashikon që pensionet të mos tatohen në përfitim për pjesën e kontributeve, por vetëm për kthimin nga investimi, me kusht që tërheqja të bëhet me pagesa mujore të shtrira në të paktën dy vite dhe jo në mënyrë të menjëhershme, pas përmbushjes së kushteve ligjore për përfitimin e pensionit privat. Burimi: AMFKy është artikull ekskluziv i Revistës Monitor, që gezon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”.Artikulli mund të ripublikohet nga mediat e tjera vetm duke cituar “Revista Monitor” shogëruar me linkun e artikullit origjinal.