Day: May 15, 2025

Juristi Kreshnik Spahiu ka hedhur poshtë pretendimet e Partisë Demokratike për manipulim dhe vjedhje votash në zgjedhjet e fundit, duke theksuar se PD është e vetmja parti që konteston rezultatin, pa paraqitur prova konkrete.
Spahiu argumentoi se humbja e thellë e PD-së edhe në diasporë, ku diferencat ishin të mëdha në vende si Italia, Anglia dhe Gjermania, e bën të pamundur pretendimin për manipulim masiv të votave. Ai e cilëson këtë si një “fyerje për inteligjencën kombëtare” dhe jo një problem të PS-së apo pushtetit aktual.
“Në kaq parti në garë elektorale, si ka mundësi që vetëm një parti e konteston rezultatin dhe procesin, që në fakt ka 50% e komisioneve dhe votave?! Nuk po ankohen partitë e tjera apo të vogla… Ata nuk thonë se u janë vjedhur votat me shumicë. Këta pretendojnë se janë vjedhur votat nga bandat kriminale… Si shpjegohet vota e diasporës shqiptare në Itali, Angli, Gjermani etj., ku diferenca është e madhe? Kjo është fyerje e inteligjencës kombëtare dhe jo problem PS-je dhe pushteti.”
Ai vlerësoi gjithashtu rezultatin e Berishës si të lartë, duke marrë parasysh situatën e tij politike dhe penale.
“PD ka marrë 50 dhe kur ke një lider që nuk kalon dot as La Manshit dhe është non grata, duhet të kishte përfunduar me 5 deputetë dhe jo me 50. Por ai ka elektoratin e tij, si në kohën e Enver Hoxhës ka elektoratin e tij dhe që i qëndrojnë besnikë…”
Në lidhje me konsulentin amerikan Chris LaCivita dhe sjelljen e opozitës, Spahiu tha se elektorati i PD-së është i vendosur dhe konsulenti ka parë Shqipërinë thjesht si një mundësi fitimi.
“Shqipëria është vend i veçantë, që po t’i dali edhe një kaldaist i ambasadës, besojnë verbërisht, manipulohen, besojnë verbërisht te Berisha… Pas katër vitesh do akuzohet edhe Trump për korrupsion dhe kështu me radhë… për këta vetëm Berisha dhe Meta nuk janë të korruptuar apo janë të pastër. Këta nuk e kuptojnë që këta e kanë prerë faturën.”