Adriatik BALLA
Kampionati do të luajë të dielën ndeshjet e xhiros së fundit të tij, të paktën për kalendarin e rregullt, ndërkohë që menjëherë më pas do të luhen ndeshjet “play-off”, që sipas formatit që organizon Federata Shqiptare e Futbollit është në versionin “Final Four”, që do të thotë katër ekipet e renditura më mirë bëjnë një turne me eliminim direkt gjysmëfinal e final për të përcaktuar fituesin e titullit.
Për momentin në vend të parë është Egnatia, skuadër që shihet favorite për trofeun edhe këtë sezon, kurse në valle shtohen Vllaznia e Dinamo, që kanë shanse reale, ndërsa Elbasani dhe Partizani që mbajnë për momentin vendet 4 dhe 5 do të rivalizojnë me njëra-tjetrën për një vend në fazën “Final Four”. Për këtë përplasje duket se e gjithë vëmendja e kampionatit është nga Tirana dhe Elbasani. Natyrisht, një vëmendje të shtuar do të ketë edhe në fundin e tabelës, ku Tirana, një prej skuadrave më të mëdha e me historik të pasur të futbollit tonë, ndodhte në “fije të perit”, në vend të parafundit, ku ndoshta as fitorja nuk do t’i bëjë punë. Gjithsesi, bardheblutë ende kanë shpresë se mund të mbijetojnë.
Partizani duel direkt për “Final Four” me Elbasanin
Partizani do të luajë 90 minutat më të rëndësishme të sezonit këtë të dielë, pasi përplaset me një rival direkt për vendin e katërt në renditje, sikurse është Elbasani. Pra, thënë ndryshe, të dielën skuadra e Skënder Gegës luan shansin e fundit të sezonit për të shkuar në Europë, por, pse jo, edhe për të synuar titullin në ato dy ndeshje të fundit. Është një duel përcaktues përballë Elbasanit në orën 15:30 në “Arenën e Demave” në javën e fundit të sezonit. Elbasani ka po aq pikë sa Partizani (50), por ka avantazhin në ndeshje direkte dhe kundër të kuqve do t’i mjaftonte një barazim për t’u renditur në vendin e katërt dhe shkuar në “Final 4”.
Por kjo nuk është e vetmja vështirësi për ekipin e kuq, pasi kundër Egnatias, “faturës” së humbjes iu shtuan edhe dëmtimet e Janjevës dhe Mehmetit, të cilët lanë fushën e lojës të detyruar. Situata e tyre do të jetë më e qartë ditën e sotme pas testeve, por shanset që të luajnë kundër Elbasanit janë minimale. Lista e dëmtimeve vazhdon me Buxhelajn, që mungoi në këtë ndeshje dhe rrezikon shumë edhe këtë të radhës, si dhe Zekën, që e ka mbyllur tashmë sezonin. Pjesa tjetër e skuadrës janë të gatshëm, me trajnerin Gega, i cili me siguri do të duhet të “shpikë” sërish për hedhur në fushë një skuadër konkurruese kundër Elbasanit. Verdheblutë janë një nga skuadrat më në formë të javëve të fundit dhe “kërcënojnë” jo pak të kuqtë. Ndërkohë, Elbasani vijon përgatitjet për duelin e të dielës. Emiljano Musta dhe Arsen Kasa janë drejt rikthimit, të paktën për të qenë në stol në këtë ndeshje. Sa i përket më pas formacionit, pritet që të mos ketë shumë ndryshime me ndeshjet e kaluara, duke qenë se skuadra ka funksionuar. Gjithsesi, trajneri Gvozdenoviç ka edhe dy ditë në dispozicion për të shuar edhe dyshimet e fundit që mund të ketë në lidhje me titullarët. Elbasanit në këtë ndeshje i mjafton edhe një barazim për të shkuar në “Final 4”, ku do të kishte mundësinë të dilte kampion.
