Adriatik BALLA
Merkato po afron dhe klubet e mëdha europiane po ndjekin që tani tregun, duke piketuar elementët e dëshiruar me të cilët do të lidhen gjatë afatit zyrtar të transferimeve verore. Në treg do të dalë edhe Barcelona, për të kërkuar elementët që dëshiron trajneri Hansi Flik. Tekniku gjerman po e udhëheq Barçën drejt titullit në Spanjë dhe në Champoions League europiane, ndaj klubi duket i vendosur t’ia plotësojë dëshirat. Në fakt, pranohet në mediat spanjolle, që klubi i Barcelonës është gjithnjë e më afër njërit prej qendërmbrojtësve më të kërkuar në treg: Jonathan Tah. Mbrojtësi gjerman ka konfirmuar publikisht se nuk do të vazhdojë me Bajer Leverkusen pas përfundimit të këtij sezoni — një vendim që ai ia kishte komunikuar klubit gjerman më parë dhe që tani e ka bërë zyrtar. Tah, i cili përfaqëson kombëtaren gjermane dhe ka kontratë që përfundon në qershor, ka shprehur qartë dëshirën për të përballuar sfida të reja jashtë Bundesligës, me një synim të veçantë: të veshë fanellën Blaugrana.
Qendërmbrojtësi ka qenë objektivi i Barcelonës edhe verën e kaluar, por Leverkusen vendosi ta mbajë edhe pse kishte mbetur vetëm një vit në kontratë. Sipas Sport, kontaktet mes palëve nuk janë ndërprerë asnjëherë, dhe Barça ka mbajtur lidhje të vazhdueshme me lojtarin dhe përfaqësuesit e tij. Trajneri i ardhshëm i Barcelonës, Hansi Flik — që është gjithashtu bashkëkombës me Tah — e mbështet fuqishëm transferimin e tij. Ai e konsideron ideal për të përforcuar mbrojtjen, falë forcës fizike, shpejtësisë dhe aftësisë taktike për të aplikuar presion të lartë dhe për të kontrolluar linjën e pozicionit jashtë loje. Megjithatë, nënshkrimi i tij varet nga largimi i njërit prej mbrojtësve aktualë. Ronald Araujo, Inigo Martinez dhe Pau Kubarsi janë elementë të rëndësishëm për Flik, ndërsa e ardhmja e Andreas Kristensen mbetet e paqartë.
Nuk përjashtohet as shitja e mundshme e Araujos, nëse vjen një ofertë që përmbush klauzolën e lirimit të tij. Pavarësisht interesit të madh nga Bajern Munich dhe ofertave shumë më të mëdha financiarisht nga Premier League, Jonathan Tah e ka vendosur si prioritet kalimin te Barça dhe dëshiron të luajë në “Camp Nou”. Ndihmë në këtë drejtim vjen edhe nga menaxheri i tij, Pini Zahavi, i cili ka një marrëdhënie të ngushtë me presidentin Joan Laporta — një faktor që e lehtëson procesin e negociatave. Me largimin e konfirmuar nga Leverkusen, hapi i parë është bërë. Tani, rruga për të siguruar këtë përforcim strategjik është e hapur për Barcelonën.
Flik kërkoi Jonathan Tah, Barcelona gati t’ia plotësojë dëshirën trajnerit gjerman
