Dy vite pas shitjes së Sandro Tonalit te Newcastle, Milani rrezikon të përjetojë një tjetër episod të dhimbshëm me një nga lojtarët më të rëndësishëm të skuadrës: Tijjani Reijnders. Mesfushori holandez, ndër të paktët që ka lënë përshtypje pozitive në një sezon të errët për kuqezinjtë, është bërë objektivi i radhës për Manchester Cityn e Pep Guardiolës.
Sipas asaj që raporton ‘Tuttosport’, kampionët e Anglisë janë të gatshëm të ofrojnë plot 70 milionë euro për shërbimet e Reijnders, i cili u transferua verën e kaluar nga AZ Alkmaar dhe u bë shpejt një element i pazëvendësueshëm në mesin e fushës së Milanit.
Kjo ofertë vjen në një moment shumë të ndjeshëm për klubin kuqezi, i cili aktualisht gjendet në vendin e tetë në Serinë A dhe me shpresa minimale për të siguruar një vend në kompeticionet evropiane. Një shitje e mundshme e Reijnders, pavarësisht përfitimit financiar, do të mund të thellonte krizën e besimit mes tifozëve dhe klubit, që tashmë janë shumë të zhgënjyer nga drejtimi teknik dhe ai administrativ.
Rreziku i një “Tonali-bis”
Në verën e vitit 2023, largimi i Sandro Tonalit u shoqërua me një merkato të bujshme që e zbuti disi goditjen. Por këtë herë situata është ndryshe: Reijnders përfaqëson sot një nga shumë pak pika të forta të një projekti që po dështon dhe largimi i tij pa një vizion të qartë për të ardhmen mund të ishte një goditje e rëndë për ambientin kuqezi.
Nëse Milani zgjedh ta shesë edhe këtë shtyllë të mesfushës, atëherë kriza nuk do të jetë vetëm sportive, por edhe identitare. Dhe pyetja që lind është: a ka ende një projekt të qartë në shtëpinë kuqezi, apo çdo verë do të jetë një tjetër fillim nga e para?