21 Nëntor 2025
7:50
Alfred Lleshi
Partia Demokratike në SHBA ndezi debatin politik dhe atë sportiv duke publikuar në TikTok një video me Lionel Messin, vetëm 24 orë pasi “Shtëpia e Bardhë” publikoi pamjet e presidentit Donald Trump duke ecur me Cristiano Ronaldon, të shoqëruara me mbishkrimin “two GOATs”.
Videoja e demokratëve përmbledh momentet më ikonike të Messit; gola historikë me Barcelonën, lojëra me PSG-në, festime me Argjentinën dhe paraqitjen e njërit prej 8 “Topave të Artë”; një kundërpërgjigje simbolike ndaj gjestit të Trumpit.
Vizita e Ronaldos në Washington, së bashku me Georgina Rodriguez, u kthye në fenomen politik e mediatik. Trump theksoi entuziazmin e të birit, Barron, për takimin me yllin portugez, ndërsa interpretimi publik ishte se presidenti kërkonte të lidhej me një nga figurat më me ndikim në sport.
Ronaldo, tashmë promotori kryesor i projektit global të Arabisë Saudite dhe i Botërorit 2034, u shfaq në SHBA vetëm 7 muaj para Botërorit 2026, duke nxitur spekulime mbi motive promocionale. Përplasja Messi–Ronaldo u transferua kështu në arenën politike amerikane.