Anglia, e kualifikuar në Kupën e Botës 2026, përgatitet për dy ndeshjet e fundit në grup, ato ndaj Serbisë dhe Shqipërisë. Trajneri i Anglisë, Thomas Tuchel, ka zbuluar se flet rregullisht me sulmuesin Marcus Rashford, duke e paralajmëruar se duhet të shënojë dhe krijojë më shumë. Përndryshe, ai mund të pendohet për mundësitë e humbura kur të jetë në fazat e fundit të karrierës së tij.
Rashford po bën një paraqitje të mirë te Barcelona, ku dhe është huazuar nga Manchester United këtë verë. “Marcus mund të jetë një nga më të mirët në botë për shkak të përfundimit dhe cilësisë që shoh në stërvitje. Me të dyja këmbët dhe kokën e tij ai është shpërthyes, është i shpejtë, është i fortë në ajër. Kështu që, për të nuk ka kufij“, tha Tuchel.
“Por shifrat nuk e arrijnë potencialin. Ai duhet të shtyjë veten me përfshirjen në gola. Ai e di këtë nga unë. Mendoj se ai ende duhet të marrë këto vendime. Ai është ende mjaft i ri për të marrë këto vendime sepse përndryshe mund të zhgënjehet pas 10 vitesh me atë që mund të kishte qenë dhe atë që mund të kishte bërë“, shtoi më tej trajneri i kombëtares angleze.
“Ky duhet të jetë qëllimi kryesor për të, të vazhdojë ta shtyjë veten deri në limit. Dhe limiti për të është shumë, shumë i lartë, ndoshta më i lartë se për të tjerët. Ai e ka këtë potencial. Por potenciali është një fjalë e rrezikshme në sportet e nivelit të lartë, sepse duhet të arrish maksimumin tënd personal rregullisht. Kjo kërkohet në këtë lloj niveli dhe kjo është sfida për të. Nuk është çështje talenti”, tha Tuchel.
Tuchel: Ai ka potencialin të bëhet një nga sulmuesit më të mirë në botë, nuk duhet ta shpërdorojë talentin
