“Dhoma gazi për shqiptarët”/ Skandal në Maqedoninë e Veriut, “Majmunët” thirrje raciste në stadium

Një tjetër skandal ka ndodhur gjatë një ndeshjeje futbolli në kategorinë e dytë në Maqedoninë e Veriut, ku tifozët vendas kanë bërë thirrje të hapura antishqiptare. Tifozët e skuadrës Pobeda kanë thërritur: “Dhoma gazi për shqiptarët”, gjatë sfidës ku ekipi i tyre u mposht 1-0 nga Shkëndija e Haraçinës. Ndeshja ishte e vlefshme për javën e 10-të të kategorisë së dytë, ndërsa thirrjet skandaloze u regjistruan nga tifozeria e Pobedës. Tifogrupi i njohur si “Majmunët”, në Prilep, u dëgjua sot duke bërtitur të njëjtat parulla raciste. Ata njihen për qëndrimet e tyre shoviniste ndaj shqiptarëve, pasi edhe në ndeshje të mëparshme, përfshirë ato të Kombëtares shqiptare në Maqedoninë e Veriut, kanë bërë thirrje të ngjashme.