Milan ka fituar 2-1 ndaj Napolit në supersfidën e javës së pestë në Serie A, e luajtur në “San Siro”. Kuqezinjtë gjetën golin që në minutën e tretë, ku Christian Pulisic tregohet fenomenal, pas një pasimi të marrë nga Estupinan, amerikani niset më shumë se nga gjysma e fushës dhe kalon secilin që i del përpara dhe në fund asiston për Alexis Saelemaekers, i cili e kishte shumë të lehtë për ta dërguar në rrjetë. SHIKOGOLIN
Në minutën e 30-të, kuqezinjtë do të dyfishonin shifrat, pas një kombinimi të përkryer Pavlovic-Fofana-Pulisic, ky i fundit “shkund” portën e mbrojtur nga Meret. SHIKOGOLIN
Pjesa e parë mbyllet 2-0 nga kuqezinjtë, një dominim absolut në çdo drejtim nga të besuarit e Max Allegri-t. Pjesa e dytë nisi më mirë për napolitanët. Në minutën e 55-të, Estupinan shkakton penallti, pas një ndërhyrjeje të gabuar ndaj Di Lorenzo. SHIKORASTIN
Arbitri kryesor i takimit shkon të shohë vetë pamjet në ekran, penallti për Napolin, karton i kuq për Estupinan. Kevin De Bruyne dërgon topin në rrjetë nga 11-metrat.
Allegri menjëherë kryen një zëvendësim të detyruar, largohet Pulisic, për të forcuar mbrojtjen me Davide Bartesaghi. I gjithë “San Siro” në këmbë dhe me duartrokitje të shumta për amerikanin, lojtarin më të mirë të ndeshjes.
Në 20 minutat e fundit u aktivizua edhe Rafael Leao, i rikthyer nga dëmtimi. Në minutat e mbetura nuk pati ndryshim të rezultatit. Milan fiton 2-1 dhe kryeson renditjen me 12 pikë, aq sa Napoli dhe Roma, por kuqezinjtë kanë golavarazhin më të mirë.
Milan ia del të fitojë me 10 lojtarë kundër Napolit dhe ngjitet në krye (video)
