Janë luajtur ndeshjet e javës së 20-të dhe të fundit të sezonit të rregullt të Superligës në basketboll për meshkuj. Besëlidhja korri fitoren e 19-të, duke fituar pa shumë vështirësi ndaj Tiranës në “Asllan Rusi” me rezultatin 88-70.
Një ndeshje e komanduar nga skuadra kampione, që u shkëput që në 10-minutëshin e parë dhe më pas administroi avantazhin deri në fund. Pesë lojtarë të Besëlidhjes realizuan mbi 10 pikë, duke i bërë të pavlefshme 27 pikët e Jefferson për Tiranën.
Fitore të lehtë korri Teuta, që në fushën e saj mundi thellë 107-65 Kamza Basket, tashmë të rënë në Kategorinë e Parë. Një ndeshje pa histori, komanduar nga durrsakët, ku u dalluan Powell me 33 pikë e Gorea me 25 pikë.
Superliga-Meshkuj, java e 20-të
Teuta – Kamza Basket, 107-65
Besëlidhja – Tirana, 88-70
Vllaznia – Apolonia, 6 prill
Renditja: Besëlidhja 39 pikë, Teuta 31 pikë, Apolonia 28 pikë, Tirana 28 pikë, Vllaznia 26 pikë, Kamza Basket 24 pikë.
Besëlidhja fiton pa probleme ndaj Tiranës, Teuta bën detyrën ndaj Kamza Basket
