Ideja fillestare e Barcelonës ishte që të shpallte zyrtarisht se Lamine Yamal do të mbante fanellën me numrin 10, duke e lidhur këtë moment me një aktivitet të planifikuar për ditëlindjen e tij të 18-të, ashtu siç kishte raportuar “Mundo Deportivo”. Sidoqoftë, gjithçka mund të përshpejtohet, ky njoftim mund të bëhet që të martën.
Ylli i ri blaugrana do të mbushë moshën madhore të dielën, më 13 korrik, datë kur do të hyjë zyrtarisht në fuqi kontrata e tij e re deri në vitin 2031. Megjithatë, vetë Lamine e parapriu komunikimin e klubit të shtunën në mbrëmje, duke publikuar në rrjetet sociale një foto të Diego Armando Maradonës nga pas, me fanellën e Barcelonës dhe numrin 10.
Më pas postoi një imazh të tij duke festuar një gol me numrin 19 dhe një tekst të shkurtër: “Fanella ime, historia ime”, sikur ta mbyllte atë kapitull. Për të larguar çdo dyshim, babai i Lamine shkroi në Instagram: “Jo vetëm që e meriton fanellën 10. E meriton edhe shumë më tepër”.
Në këtë kontekst, dhe duke qenë se tashmë është e ditur publikisht se kush do ta mbajë numrin legjendar, “Jijantes” raporton se, duke përfituar nga fakti që të mërkurën, më 2 korrik, do të dalin në shitje fanellat e reja, një ditë më parë do të njoftohet se Lamine do të heqë dorë nga “19” për të marrë “10”, sapo të zyrtarizohet huazimi i Ansu Fati te Monaco për sezonin e ardhshëm.
Pas shpalljes së transferimit të Paul Pogba nga klubi i Principatës, të shtunën, plani i dakorduar me Barcelonën është që të martën të konfirmohet huazimi i Ansu Fati. Kështu, numri 10, që trashëgoi lojtari hispano-guinean nga Leo Messi, do të transferohet në shpinën e Lamine Yamal.
Kjo do të lejojë që të ketë mjaftueshëm kohë që të mërkurën, më 2 korrik, të shfaqen në dyqanet “Botigues del Barça” pafund fanella me numrin 10 dhe emrin e Lamine Yamal të stampuar në shpinë, duke nisur kështu një verë me shitje masive. Brenda klubit blaugrana tashmë janë duke “fërkuar duart”…
Yamal “përdor” Maradonën për “t’u shenjtëruar” si numri 10 i ri i Barcelonës
