Xhirime gomash dhe manovra të rrezikshme, e pësojnë dy të rinjtë në Durrës

Dy drejtues automjetesh në Durrës janë proceduar penalisht pasi prishën qetësinë publike gjatë natës me zhurma të forta nga xhirimet e gomave në bulevardin “Dyrrah”. Gjatë patrullimeve 24-orëshe, shërbimet e Patrullës së Përgjithshme të Komisariatit të Policisë Durrës konstatuan se të rinjtë po shqetësonin banorët e zonës duke prodhuar zhurma të larta me automjetet tip Audi dhe BMW që drejtonin, si dhe duke kryer manovra të rrezikshme. Policia sekuestroi të dy automjetet dhe një fenelinë, ndërsa Specialistët për Hetimin e Krimeve referuan materialet në Prokurori, ku ka nisur procedimi penal ndaj shtetasve A. Ll., 30 vjeç, dhe K. K., 21 vjeç, të dy banues në Durrës. Materialet u dërguan në Prokurorinë e Durrësit për veprime të mëtejshme.